God

Bo en behalwe die onvermoë van die mens vanweë sy verlore toestand om homself te kan red, word die probleem steeds groter wanneer ons kyk na wat die Bybel omtrent God sê, naamlik dat Hy heilig is (1 Pet. 1:16); regverdig is (Jak. 11:20) en ongeregtigheid haat (Hebr. 1:9). Die Bybel leer ook dat God ‘n liefdevolle God (Joh. 3: 16; Joh 4:9); asook ‘n God van genade is (Rom. 5:15).Hy moet met ons sonde deel vanweë Sy heiligheid, maar wil ons nie vanweë Sy liefde laat verlore gaan nie. Die vraag is : Wat is die antwoord vir hierdie dilemma?  God het ‘n antwoord op die vraagstuk, naamlik, dat Hy Sy Seun in hierdie wêreld gestuur het (Joh. 3:16).

Heilige Gees

Die bespreking begin met Paulus se vraag aan die gelowiges in Efese: “Het julle die Heilige Gees ontvang toe julle gelowig geword het?” Hierdie vraag bly vandag relevant vir alle gelowiges. Met die eerste oogopslag kan dit lyk asof hierdie gedeelte suggereer dat iemand ‘n gelowige kan word sonder om die Heilige Gees te hê of ‘n gelowige kan wees sonder om die Heilige Gees te ontvang.

Hierdie oënskynlike teenstrydigheid word egter opgelos deur ander Bybelgedeeltes te oorweeg. Romeine 8:9 sê byvoorbeeld dat as iemand nie die Gees van Christus (die Heilige Gees) het nie, hulle nie aan Hom behoort nie.

Die paradoks wat verheldering verg, lê daarin dat, aan die een kant, ‘n gelowige die Heilige Gees se teenwoordigheid ontvang op die oomblik van wedergeboorte, terwyl hulle aan die ander kant die gawe van die Heilige Gees tydens ‘n daaropvolgende ervaring ontvang, dikwels na bekering en die doop, soos gesien in Handelinge 2:38.

Jesus

Die Bybel leer dat Jesus Christus die plaasvervanger van en vir die wêreld se sonde geword het, naamlik, dat God die mens se sonde op Jesus gelê het (Jes. 53:5)

Dit verwys na die kruisiging waar Jesus dan uitroep: “Dit is volbring” of “dit is betaal” (Joh. 19:30).Op grond van Jesus se werk, die feit dat Hy die sondeskuld betaal het, kan die mens nou vergifnis en vryspraak by God ontvang (1 Joh. 1:9).